ماني شبه عريسك انا

[بنت الاسكلة]

بسم الله الرحمن الرحيم
ماني شبه عريسك انا
حرم..!
الكرم و الجود و الطورية و الواسوق
ياها ورثتي من جدي
و شباكا يجيبلي هواك.. اتحداك!
و من تالاي عدييييييل سدي
ماني شبه عريسك انا.........
عريسك انتي شبهو براه
عريسك يشبه القمرة
يضايقك ديمة في التوليت و الارياح و للخمره
كمان عند حفرة الدخان يقول ليكي ياخي.. زحي كدي
ملقطة كلك اسبيرات متل فضية العدي
اضافر ايديك فرنسية و رموش عينيك هولندي
كدي عاد اقلعي الباروكة كان ما تشبهي الكدي!!
ماني شبه عريسك انا.....
انا كان وديتك ارقي...
هناك بتشيلي الصفيح تردي
حتى إن كان مراحنا جعان .. تعرفي تمعطي السعدي
و إن كان ما لقيتي الباسطة.. من الدومة بتكدي
ماني شبه عريسك انا .....
انا كان قلت انتي جميلة ..زوولي انا في الجمال هندي
و إن كان قلت زيك مافي..عايني و في النجوم عدي
امانة الدنيا مليانة حور و حواء كم والدة
بنات في رفاعة اب سن... و بنات في غرب شندي
ماني شبه عريسك انا.....
عليكم الله يا اخوان شوفو المطرطشة دي!!
اقول ليها كان تسوي كدي و اخير ليكي تسوي كدي
تقول لي no و اسفة sorry ذوقك لسة ذوق بلدي
ماني شبه عريسك انا......
انا عندي ليكي وصية اخير تاخديها من عندي
عشان عرس البلد عزة... و عشان عرس المدن شهد
انا بعشق من البندر و بعرس من بنات بلدي
ماني شبة عريسك انا ....



اتمنى تعجبكم بس

[ام روعه]

تسلمى يا غالية...
وكترى لينا من الشعر الحلمنتيشى

[أم الأولاد]

البنات الملقطين كلهم ازبيرات بقو كتااار لمن تشابة علينا البقر
حسي ياربي يعرفو الاصل كيف؟؟
تحياتنا يا رائعة