مطبخنا السودانى

[سهيله]

الحقيقة آكلت فى مطابخ عالمية كتييير بس مالقيت أحلا من الأكل السودانى وأكيد كلكم حتتفقو معاى فى الكلام دا لأنو أكلنا مش عبارة عن مقادير ممزوجه ببعض وخلاص
مطبخنا دا عبارة عن كمية المشاعر التى تبثها أمهاتنا وحبوباتنا (ربنا يديهم العافية ) عبر الأكل يعنى هسى اى زول بقول أمو احسن وحده تعمل الأكل ويمكن ماتكون ليها أى علاقة بالأكل لكن هو شايف كدا لأنو بضوقو بقلبو مش بلسانو ..
وطبعاً فى ربات منازل لسه على اول سلم الباب بقولن ياهادى وماليهم أى دراية بالأكل السودانى والواحده عشان تجى تعمل حلة تجهجه جنس جهجه فى الدنيا دى تتصل على أمها وخالتا وأختا وغايتو والوحده تكون شغالة كدا على روحا وعشان نساعد الفئة دى ح نعمل المطبخ دا فيه كل الوصفات من مفاريك وطبايخ وسلطات ..
وكمان ماناسيين الإخوة العزاابة المطبخ دا كمان حيساعدم من الحلة الواحده ديك


أرجو من الأخوات المساعده وتبادل الخبرات

[سهيله]

ح أبدأ ليكم بحاجة بحبها شديد

سلطة الأسود المشوى

المقادير :
4 حبات اسود
كوب زبادى ياريت حامض
فول سودانى (دكوة )
ملح على حسب التفضيل
2 فص ثوم
رشة فلفل
(طماطم + فلفل أخضر + بصل أخضر ) شطة خضراء مقطعه على حسب الرغبة
ليمونه

طريقة العمل :

نشوى الأسود على النار بقشرو والنار لازم تكون هااادية عشان مايحرق من برة ومن جوه يكون لسه بعد نتأكد إنو إتشوى كويس نختو على حله فيها مويه كتييرة ونبدأ بتقشيرو ومن ثم هرسه جيداً ونضيف عليه الدكوة والزبادى والملح والثوم والفلفل وعصير الليمونة ونقلبها جيداً وإذا حابيين نضيف الطماطم والبصل والشطة الخضراء .



وبالهنا ,,,

[سارة عمر]

سهيلة موضوع جميــــــل ومفيـــــــد
اكيد لي رجعه وبوصفـــــــــــــات خطــــيرة

[سهيله]

سهيلة موضوع جميــــــل ومفيـــــــد
اكيد لي رجعه وبوصفـــــــــــــات خطــــيرة

سارة والله هو موضوع مهم جداً جداً حتستفيدى منو قررريب بإذن الله
فى إنتظار الوصفات

[هشام صالح]

تعالوا حنعلمكم حاجة اسمها القطر قام .....هاتي كل التلاجة من خضار ولحمة وكل ما يخطر على بالك وكلها في حلة واحدة وتكبوها كلها في وقت واحد وأديها نار تقيل ....بدون اي وصفات أو اي روشتة ( والله حلة لكم تقول عليها فيلم هندي