رئيس التحرير

يخارجنا منها الخارج بن على!!

الأربعاء 11-07-2018 20:27

كتب

(1)

يقتلون القتيل ويمشون فى جنازته.. ليتأكدوا أنه مات فعلياً ثم يعرفون مكان مقبرته.من هم؟

(2)

زمان العرب لا تقوم للترك.. والترك لا تقوم للروم.. والروم لا تقوم للعرب ولكن عرب اليوم تقوم وتركع وتسجد لكل من هب ودب وكثيرة التبرك بتراب وجدران البيت الابيض!!

(3)

معلوم ان اغلب الطير لا تدخر ولا تهتم لغدٍ.. ولكن نحن صرنا اسوأ من الطير فلا نستطيع ان ندخر لغدٍ وصار نهتم كثيرا بغدٍ وألم تسمع المغنى حين يغنى (ديمه بشيل الهم ليوم بكرة)؟

(4)

ولما كانت الايام كلها لله فلا يحوز ان نصفها بانها ايام نحس وشؤم وفقر ولكن فى يوم 30 يونيو 2018 خرجت الارجنتين والبرتغال على التوالى من بطولة كأس العالم فبكى فى ذلك اليوم بكى من بكى ورفض العشاء من رفض وفى ذات التاريخ 30 يونيو 1989 اى قبل ثلاثين عاما دخلت الى حياتنا ثورة الانقاذ الوطنى ولم تخرج حتى اليوم.. وان شاء الله (يخارجنا)منها الخارج الارجنيتن والبرتغال والذى خارح بن على .

(5)

السيد الفاضل سعادة (الرخاء ) باشا هو شخصية ضنينة بالزيارة ونحن نسمع به ولا نراه.. ويبدو لى ان السيد الرخاء لا يزور الشعوب التى ترى حقوقها المنهوبة والمسروقة والمضيعة ولا تتطالب باستردادها ولا تسأل عنها.

(6)

فى هذه الايام الجماعة رجعوا تانى يتحدثون عن الدعم الحكومى للشعب وبالامس احدهم يقول ان الدولة وهو يقصد الحكومة دعم المواد البترولية ب50% يعنى يامواطن يامؤمن جالون البنزين الذى تشتريه من الطرمبة ب30جنيه.. الحكومة تدفع ليك 15جنيه كدعم ليك (اها شابف الدعم دا وللا نظرك ضعيف؟) وما يستفاد من هذه النظرية أن مسألة رفع الدعم عن المواد البترولية ولو تدريجيا هو مسألة وقت فقط وغداً لناظره لقريب

(7)

دائما نمسع ونرى أشخاص نافذين من حكومة المؤتمر الوطنى من الذين يطلون علينا عبر النشرة الرئيسية من فضائية المؤتمر الوطنى وقلنا فضائية المؤتمر الوطنى لاننا لم نشاهد مثلاً احد قيادات حزب البعث السودانى (واقفاً او جالساً يتحدث عبر الفضائية السودانية) وهولاء النافذين يزعمون انهم خائفين على السودان من الضياع.. وهم يزعمون هذا الزعم لسببين الأول رغبة فى الذهب الذى يتم تهريبه عبر مطار الخرطوم والسبب الثانى رهبة من الحزب وقطع الامداد المالى عنهم والسؤال هل هولاء النافذين هم وحدهم الخائفين على الوطن من الضياع؟ ولكن أرى ان أكثر الناس حديثاً عن ضياع السودان هم من أضاعوه فى وضح النهار وساعدوا على (فرتقته حتة حتة) بل ساعدوا على إعماره بالخراب الممهنج والمخطط له.

(8)

يحدث فى حلتنا أم المصائب ان احدهم ضرب طالب ثانوى عام كفاً فجاء والده وقال للضارب ضربت الولد دا ليه؟ انا مابخلى زول يمد يدو على اولادى واى زول بمد يدو عليهم بقطعا ليهو بسألك ضربت الولد دا ليه؟ فقال (عمك المسكين) الذى كان يعشم بان ولى أمر هذا الولد المضروب سيشكره على عمله وان عمك ما زال يعتقد انه يعيش فى زمان الشارع والجيران يشاركون فى تربية الاولاد وبعد ان بلع عمك ريقه ثلاث مرات قال والله لقيتو طالع من المدرسة وبشرب فى سجارة.!! فقال الاب ما يشرب سجاير السجاير مشتريهو ليهو أنت؟ حق السجاير دا دفعتو من جيبك؟ ان شاء يشرب خمرة ومخدرات وإنت مالك ومالو والله لو ما أنت زول كبير كان خليتو ضربك زى ماضربتو!! يلا يا ولد ارح على البيت.. ومنذ تلك الحادثة ترك عمك (المندهش ) ترك الامر بالمعروف والنهى عن المنكر وصار شعاره (فليسعك بيتك) ولا تحشر نفسك فى شئون الاخرين.

 

التعليقات مغلقة.

معتز مطر: السودان تحرر جنودنا المخطوفين و ضحكات السيسي تتعالي مع الشباب .. ؟!!