رئيس التحرير

قلبي الصغير… لا يحتمل

الأربعاء 13-09-2017 11:35

كتب

قاتل الله الأسافير.. فهي تاتي لنا بالاخبار من كل حدب وصوب.. تجعلنا دائما في موضع المقارنة مع حالنا.. ليه كدا بس.. ما كنا كويسين وكافيين خيرنا شرنا.. فاكرين نفسنا احسن ناس.. وما في زول زينا.. والمشكلة الاكبر في المصادفات العجيبة.. على سبيل المثال وليس الحصر.. في ذات الوقت الذي (فاحت) فيه رائحة صفقة سيارات ولاية القضارف المليارية.. كانت هناك صور متداولة لرؤساء وزراء بلاد الكفر.. وهم يذهبون الى مقر عملهم بواسطة المواصلات العامة.. بل هناك صورة لوزير المالية الألماني وهو يقود دراجة.. (عجلة عديل كدا).. وكان التعليق المصاحب للصورة هي (وزير مالية الدولة التي تنتج 18 الف سيارة مرسيدس في السنة).. عليك الله صور زي دي.. ارى من الواجب حجب المواقع التي تبثها.. والتبليغ عن كل من يتداولها.. حفاظا على صحتنا وصحة ولادنا.
احدى هذه الصور.. صورة لمدينة اوروبية.. اصطف أهلها صفوفا طويلة.. لكي يدلوا بأصواتهم.. مش لانتخاب الوالي ولا المجلس التشريعي.. لا والله كضبا كاضب.. انما لكي يقولوا رأيهم بصراحة في مجموعة من الأوز تسبح في بحيرة.. أشتكى بعض السكان من الأزعاج.. فكان التساؤل.. هل تترك هنا؟؟ ام يتم ابعادها الى محمية طبيعية خارج المدينة.. عليكم الله شوفوا فياقة الخواجات ديل!! .. دي حاجة يشاوروا فيها الشعب؟؟..
تعالوا شوفوا عندنا.. ناس امسك لي وأقطع ليك.. نحن نصحى الصباح نلقى الساعة قدموها.. كدا بس.. منهم ليهم شافوا ان خير الشعب والامة في تقديم الساعة.. وقالوا سنلحق بركب الامم والدول المتقدمة.. اها قعدنا ساعتنا متقدمة كم وكمين سنة.. فجأة.. اكتشفوا.. انو الساعة متقدمة ونحن راجعين لي ورا.. قوم ايه… قالوا نرجع الساعة.. برضو كدا منهم ليهم… شفتوا الجمال دا؟؟.. ناسنا قايمين بعملهم تمام.. شورى شنو !!.. كيف يعني يسألوا الشعب دا ..؟؟ هم فاضيين؟؟ الطريف في الامر.. ان ارجاع الساعة كان التبرير المصاحب له.. حتى نواكب الدول من حولنا.. يعني نحن كنا طوال هذا الوقت في رحلة خارج الزمن.. الى كوكب زحل.. وحان وقت العودة.. اربطوا الاحزمة.

الفكرة كانت شنو.. لما تم اعلان البكور.. والفكرة الان شنو لما تم الرجوع عنه؟؟ هذه اشياء عصية الفهم علينا.. لذلك يتم مناقشتها وانزال القرارات علينا.. وهذا امر يجب ان نشكر عليه ولاة امورنا (ربنا يجعل كلامنا خفيف عليهم).. زد على ذلك.. انني وبعد طول تفكير وتبصر.. رأيت بصيص أمل في الموضوع.. ذلك ان أفكار البصيرة ام حمد يتم مراجعتها.. والتحقيق بشأنها.. وبما ان البكور قد نال حظا وافرا من النقاش وتم تبادل الاتهامات في من تسبب به؟.. ومن هو أول من فكر فيه؟.. قرون الاستشعار تبعي قالت لي انه يمكن.. وتحت شعار (البتلبل يعوم).. وانو (ما بعيد الدنيا تبسم لينا من أول جديد) وكدا.. الرجاء.. النظر مرة أخرى في القرارات التالية
سنة تامنة ودمج المرحلتين..
المناهج الدارسية.. ناس مسكننا وملبسنا وقسمتنا وارادتنا.. والظروف الجمعتنا..
تصدير اناث الانعام..
ثورة التأليم العالي..
قانون عدم الاشتمال للادوية البيطرية..
ما قادرة اتذكر شنو تاني.. لكن كدي راجعوا الملفات دي.. وحتى اشعار اخر.. الرجاء دعم ادوية الضغط والسكري.. عشان قلوبنا الصغيرة.. لا تحتمل…

اضف تعليق

كلمة الاستاذ علي محمود حسنين في ندوة حركة تحرير السودان مكتب لندن